Klubi francez i Nantes po mendon të ndërmarrë hapa ligjorë ndaj Cardiff-it në lidhje me transferimin e Emiliano Sala, trupi i të cilit nuk është gjetur akoma.
Sipas “Mirror Sport”, Nantes i ka dërguar një e-mail të enjten klubit anglez ku i ka kërkuar pagesën e parë të 17 milionë eurove për të cilat dy klubet kanë rënë dakord, ndërsa të martën i ka dërguar edhe një letër ligjore.
Ata kërcënuar klubin uellsian në rast se nuk do të bëhet pagesa e parë (pagesa totale është parashikuar të bëhet në tre vite) brenda dhjetë ditëve të ardhshme, pavarësisht se kërkimet pas zhdukjes tragjike të argjentinasit vazhdojnë.
Cardiff ka vendosur të presë deri sa të jetë zbuluar me saktësi se çfarë ka ndodhur dhe se kush mund të fajësohet për tragjedinë pasi aeroplani, Piper Malibu N264DB, u zhduk bashkë me Sala dhe pilotin David Ibboston dy javë më parë.
Hetuesit kanë zbuluar avionin në kanalin e La Manshit dhe një trup brenda tij, por që nuk është identifikuar akoma se i kujt është.
Ata po mundohen gjithashtu të përcaktojnë se në pronësi të kujt ishte avioni, nëse ishte i siguruar dhe detaje të tjera rreth çështjes, që do të thotë se një dëmshpërblim i mundshëm mund të paguhet nga kompania e sigurimeve.
Cardiff, gjithsesi, është gati të përmbushë të gjitha detyrimet dhe, ndërsa Nantes nuk ka bërë asgjë të paligjshme, momenti i kësaj kërkese ka bezdisur shumë klubin anglez, pa harruar se familja e lojtarit është akoma e tronditur për atë që ka ndodhur.
Edhe Bordeaux duhet të marrë një pjesë të pagesës për kartonin e lojtarit, që mendohet se është 50% pasi Sala ka luajtur me ata nga 2012-ta deri në 2015-ën para se të transferohej te Nantes. Dega e Hetimit të Aksidenteve Ajrore (AAIB) ka konfirmuar të martën se misioni për të rikuperuar trupin brenda avionit vazhdon.
