Elon Musk do të flasë për herë të parë me punonjësit e Twitter-it të enjten, që kur paraqiti në prill ofertën e tij prej 44 miliardë dollarësh për ta blerë kompaninë. Shefi multi-miliarder i Tesla-s pritet të marrë pyetje nga punonjësit e Twitter-it në takim.
Musk ka paralajmëruar se mund të tërhiqet nga marrëveshja, nëse firma dështon të sigurojë të dhëna për llogaritë e rreme në platformë.
Ngjarja u njoftua nga shefi ekzekutiv i Twitter, Parag Agrawal, në një email drejtuar stafit të hënën.
Agrawal u tha punonjësve se mund t’i parashtronin pyetje zotit Musk përpara takimit. Lajmi, i cili u raportua fillimisht nga “Business Insider”, u konfirmua për “BBC” nga një zëdhënës i Twitter-it.
Takimi i përbashkët do të jetë hera e parë që Musk do të flasë drejtpërdrejt me fuqinë punëtore të kompanisë që nga fillimi i ofertës së tij për blerje.
Në fillim të këtij muaji, ai kërcënoi se do të largohej nga marrëveshja, duke akuzuar kompaninë e mediave sociale për të “penguar” kërkesat e tij, për të mësuar më shumë rreth bazës së saj të përdoruesve.
Në një letër të dorëzuar te rregullatorët, Musk tha se kishte të drejtë të bënte matjen e tij të llogarive të padëshiruara.
Letra zyrtarizoi një mosmarrëveshje që kishte nisur për javë të tëra, pasi ai e deklaroi marrëveshjen “në pritje”, në pritje të informacioneve të mëtejshme.
Analistët kanë thënë se Musk mund të jetë duke e përdorur këtë çështje për të tentuar të rinegociojë çmimin apo edhe të largohet nga marrëveshja. Ata thanë se vendimi i tij për të ngritur çështjen në mediat sociale ishte jokonvencional, duke e bërë të vështirë të përcaktohet se sa serioz ishte ai.
Kur Agrawal mbrojti procesin e kompanisë për identifikimin e llogarive të rreme në një sërë postimesh, Musk u përgjigj me një emoji poo.
Aksionet e kompanisë qëndruan në 37.03 dollarë secila në fund të tregtimit të Nju Jorkut të hënën, shumë më poshtë çmimit të ofertës së zotit Musk prej 54.20 dollarësh.
Burimi i lajmit: BBC. Përshtatur nga Tirana Today
