Prokuroria e Elbasanit ka nisur një hetim ndaj bizneseve të të gjitha familjeve të mëdha të këtij qyteti, përfshi edhe atë të kryebashkiakut, Qazim Sejdini. Nën hetim janë pronarë të bizneseve të shumta me xhiro dhe fitime në miliona euro xhiro.
Në kërkesën zyrtare të Prokurorisë së Elbasanit, theksohet se Drejtoria rajonale e tatimeve duhet të japë informacion për 66 persona, nëse janë të regjistruar si subjekte, a i kanë paguar detyrimet dhe çfarë fitimi kanë pasur ndër vite.
“Shtetasit e mëposhtëm janë të regjistruar si subjekt tatimpagues dhe nëse po, të na dërgoni informacion të detajuar në lidhje me objektin e veprimtarisë, vendin e ushtrimit, statusin, faktin nëse është debitor në pagesat e detyrimeve fiskale, masat administrative te marra, sa aktivitete janë të regjistruar në emër të tyre, fitimet që kanë realizuar ndër vite”, shkruhet në shkresën e prokurorisë së Elbasanit dhe të siguruar nga Vizion Plus.
Shefi i prokurorisë së Elbasanit Dritan Gina, ka deleguar drejtuesin e seksionit Erida Kokonozi, për të ndjekur dosjen voluminoze. Kërkesa për drejtorinë tatimore mban datën 27 tetor 2017 dhe ajo vjen pas regjistrimit të procedimit penal me nr 1542 për veprën penale te “pastrimit te produkteve te veprës penale dhe veprimtarisë kriminale” te parashikuar nga neni 287 i kodit penal.
Sipas burimeve të Prokurorisë së Përgjithshme theksohet se ky hetim lidhet edhe me ngjarjen e mesit të muajit shtator në qytetin e Elbasanit, kur një makinë “Audi” goditi mjetin e policisë gjatë një aksioni pranë tregut të qytetit.
Nën hetim për pastrim parash janë edhe persona që kanë qendra tregtare, kompani ndërtimi, kompani transporti, lokale e biznese nga më të ndryshmet. Bie në sy fakti se shumë prej emrave përbëjnë familje të tëra. Prokuroria dyshon se pronat janë transferuar mes anëtarëve të të njëjtës familje me qëllim fshehjen e te ardhurave. Ky hetim që prej elitën ekonomikë të Elbasanit vjen në kohën kur procesi i vetingut në drejtësi sapo ka nisur por ai do të përfshijë sigurisht edhe lidhjet e biznesit dhe krimin dhe drejtuesit politike në nivel lokal dhe qe qendror.
