Prokuroria e Lezhës ka kërkuar 8 vite burg për 17-vjeçarin Florian Përvathi, i cili në muajin janar të këtij viti vrau me armë bashkëfshatarin Lek Lekgjonaj. Organi i akuzës ka arritur të provojë se i riu e ka kryer krimin me paramendim për “gjakmarrje”, pasi vëllai i viktimës i kishte vrarë babanë, në vitin 2009, kur ishte vetëm 4-vjeç. Armën pistoletë e kishte siguruar në Shkodër, rreth 1 vit para ngjarjes.
Lek Lekgjonaj u ekzekutua me armë mesditën e 24 janarit 2022 në fshatin Manati të Lezhës. Autori 17-vjeçar Florian Përvathi nuk u largua nga vendngjarja pas krimit. Aktualisht ai është në burgun e të miturve në Kavajë.
Si ndodhi vrasja e Gjon Përvathit, babait të Florian Përvathi
Krimi ndodhi në rrugën kryesore që lidh Lezhën me Laçin, duke pasur si viktimë Gjon Pervathin. I biri 14 vjeç dhe një kushëri i tij u plagosën nga autori, ndërsa e shoqja e viktimës u vetëhelmua pasi mësoi atë ç’ka kishte ndodhur. Duke kujtuar se veç të shoqit kishte vdekur dhe i biri i vetëm, 40-vjeçarja Martine Përvathi i dha fund jetës me fostoksinë, duke lënë jetimë 4 fëmijë.
Autori, Ndue Lekgjonaj e ka ruajtur Përvathin dhe e ka qëlluar për vdekje. Një konflikt i hershëm mes viktimës dhe fqinjëve të tij, në fshatin Grykë-Manati të Lezhës, u bë shkak për këtë ngjarje të rëndë. Për policinë ishin të njohura konfliktet e pronësisë dhe kanosja me armë që Përvathi i kishte bërë fqinjëve, prandaj ai ishte burgosur e dënuar.
Me makinë i ka ndjekur tre udhëtarët, Gjon Përvathin, të birin, Danielin, si dhe kushëririn Gjergj Përvathi. Në hyrje të Lezhës, e shumë pranë vendbanimit, që nga makina autori Lekgjonaj, rreth 50 vjeç, ka qëlluar me breshëri automatiku. Dy plumba i morën jetën shënjestrës së tij, ndërsa një tjetër aksidentalisht dhe kushëririt të viktimës. Përballë kësaj skene, djali vetëm 14 vjeç është sulur drejt makinës së autorit për ta nxjerrë jashtë, por në tentativë për t’u larguar ai e përplasi fuqishëm.
Tragjedia e familjes Përvathi nuk përfundoi këtu. Martine Përvathi ndërroi jetë pak orë pas vrasjes së të shoqit. Nga të afërm e dëshmitarë që panë skenën e krimit, 40-vjeçarja ka mësuar se veç të shoqit, kishte vdekur dhe i biri. E rënduar nga ky lajm, gruaja ka kaluar në gjendje të rëndë depresive, duke pirë një sasi fostoksine, e cila ka qenë fatale për jetën. Edhe më herët, Gjon Përvathi ishte bërë protagonist i një sherri me armë me fqinjët e tij, Lekgjonajt. Ata shpeshherë ishin konfliktuar për kufirin e pronave që kishin dy familjet, derisa në 2008 Lekgjonaj kapi një nga delet e fqinjit që kishin hyrë në tokën e tij, duke u therur.
