Dy janë pistat në të cilat është e përqendruar policia, pas ekzekutimit të 26-vjeçarit Jurgen Kurti. Ai u qëllua për vdekje disa herë me automatik nga dy persona, të maskuar. Kurti sapo kishte zbritur nga makina e tij dhe po kalonte trotuarin për t’u ngjitur në banesë, kur ndaj tij u qëllua duke e lënë të vdekur në vend.
Një pistë ku është përqendruar prokuroria dhe policia e Tiranës është ajo e hakmarrjes, pasi Kurti është përfshirë në vrasjen e babait të tij dhe shtetasit Agim Arapi, në Durrës. Lidhur me vrasjen e Kurtit, policia e Tiranës ka sekuestruar disa pamje filmike të zonës dhe 15 gëzhoja automatiku. Po sipas burimeve të akuzës, pista e dytë është ajo e përfshirjes së 26-vjeçarit në fajde.
Kjo pasi vjehrri i viktimës, në Durrës njihet si person që jep para me fajde, veprimtari në të cilët kohët e fundit ishte përfshirë dhe Jurgen Kurti, i cili negocionte dhe kërcënonte borxhlinjtë për kthimin e shumave të parave që i kishin marë vjehrrit të tij.
Jurgen Kurti njihej si një personazh VIP, e ndërsa kishte në pronësi të paktën 10 biznese të ndryshme, nga servis makinash te kompani për menaxhime dhe organizime eventesh, kjo pasi babai i tij kishte qenë një biznesmen i njohur në kryeqytet.
