Indrit Pepa, 27 vjeç u ekzekutua me armë mëngjesin e djeshëm në Mamurras, pak pasi doli nga banesa e tij. “Report tv” ka mësuar se autori i vrasjes i cili është shpallur në kërkim quhet Agron Markola dhe ka qenë shok fëmijërie me Pepën. Indriti dhe Agroni janë konfliktuar 6 vite më parë në një lokal në Mamurras ku Pepa i ka thënë Markolës: “Ne jemi rritur bashkë, kemi veshur rrobat e njëri-tjetrin. Unë kam në shtëpi fotot e tua”. Tre ditë më pas Agron Markola dhe Azis Markola kanë rrahur Indrit Pepën me qytën e pistoletës, duke e lënë të riun në gjendje kome.
Pas një viti, kur Indrit Pepa ishte 20 vjeç ndodhej në një berberhane dhe aty ka ardhur Azis Markola. Pepa ka dalë nga berberhana dhe ka marrë një armë zjarri tip pushkë, për ta rrahur Azis Markolën. Në këtë moment disa qytetarë e kanë kapur Peoën nga dora për ta mbajtur por një plumb është shkrepur nga arma duke e plagosur Azis Markolën në të dyja këmbët. Që nga ajo ditë, nga frika e hakmarrjes familja e Indrit Pepës u ngujua. Tre vite më parë Indrit Pepa ka emigruar në Gjermani, ka kërkuar azil dhe është bërë baba i një vajze e cila sot është 3 vjeçe, shkruan Report tv. 
Pas 1 viti e gjysëm qendrimi në Gjermani, Pepa është deportuar në Shqipëri. Sipas shtetit Gjerman, Pepës nuk i rrezikohet jeta në Shqipëri. Një natë më parë Pepa u ekzekutua në orët e para të mëngjesit. Ai ndodhej duke pirë në një lokal me miqtë. Rreth orës 4 është kthyer në shtëpi pasi do i linte makinën vjehrrit. Kur ka zbritur nga makina, 27-vjeçari ka pikasur 2 persona dhe është larguar por sipas familjarëve, autorët i janë vënë pas dhe e kanë qëlluar disa herë. Pepa ka marrë disa plumba në këmbë dhe ka rënë përtokë. Sipas familjarëve autorët janë afruar dhe e kanë qëlluar sërish.
