Kryeministri Edi Rama e ka cilësuar ekstradimin e Nezar Seiti, si një “xhep fallco” që ka hapur opozita e PD-së dhe LSI-së.
I ftuar në emisionin “Real Story”, Rama ka deklaruar se Nezar Seiti i është dorëzuar drejtësisë italiane, dhe se është i bindur se nëse kjo nuk do të bëhej, atëherë sërish opozita do të sulmonte qeverinë duke thënë që nuk e dorëzuan në duart e sigurta të italianëve.
“Mos e fusni bisedën edhe ju në një “xhep fallco”. U ekstradua në duart e prokurorisë italiane një person i kërkuar zyrtarisht nga drejtësia italiane. Nëse do të kishte ndodhur e kundërta, ta siguroj që do të thoshin se “nuk ja çuan sepse duan t’i mbyllin gojën këtu me drejtësinë e kapur”. Sesa korrekt ishte ekstradimi mjafton të lexoni deklaratën e Ministrit të Drejtësisë italiane” – tha Rama.
Setiti, i cilësuar si financieri i grupit kriminal të drogës ‘Habilajve’ u ekstradua dy javë më parë në Itali me kërkesë të drejtësisë italiane. Por në media u fol se kjo levizje ishte e jashtë ligjshme. (lajmin e plotë lexoje këtu).
Seiti u arrestua në fshatin Babicë, gjatë një operacioni teksa u sekuestruan rreth 4 ton lëndë narkotike Cannabis Sativa.
Nisur nga përgjimet ambientale, por edhe telefonike rezulton se Nezar Seiti lëvizte shpesh nga Shqipëria drejt Italisë dhe anasjelltas dhe kishte detyra të siguronte ambiente dhe pjesën logjistike të grupit.
Nezar Seitit i është ofruar statusi i bashkëpunëtorit, por ai e ka refuzuar një “marrëveshje” të tillë, ndërsa ka pranuar para prokurorëve të Krimeve të Rënda se ka lidhje krushqie me Habilajt, pasi gruaja e tij i ka kushërinj.
