Avokati i Nezar Seitit, financierit të grupit Habilaj, ka reaguar për ekstradimin e këtij të fundit.
Detar Hysi, avokati i Seitit paralajmëroi se do të kallëzojë penalisht prokurorët e Krimeve të Rënda, që lejuan ekstradimin e Seitit pa prova dhe fakte në shtetin tonë, por vetëm duke u nisur nga përgjimet italiane. Hysi tha se drejtuesi i Prokurorisë ka tejkaluar kompetencat, duke shpërdoruar detyrën:
“Prokuroria e Krimeve të Rënda ka tejkaluar kompetencat, duke caktuar masë sigurimi me indicie të marra nga përgjimet italiane dhe jo me prova e fakte të ndodhura në shtetin tonë. Nuk e ka vlerësuar me objektivitet dhe në përputhje me ligjin këtë çështje. Drejtuesi i Prokurorisë së Krimeve të Rënda ka shpërdoruar detyrën, duke tejkaluar çdo kompetencë. I kam njoftuar se po ekstradohej dhe nuk morën asnjë masë. Do të depozitojë kallëzim penal për prokurorët”, ka thënë avokati Hysi.
Nezar Seiti u ekstradua pak ditë më parë në Itali, ndërsa akuzohet se bënte shpërndarjen e parave mes anëtarëve të bandës, para këto të fituara nga trafiku i kanabisit.
