Ekstradimi i Nazer Seitit ka shkaktuar reagime të shumta, teksa opozita akuzon se qëllimi i këtij veprimi është që Tahiri t’i shpëtojë drejtësisë, teksa e konsideron Seitin një nga dëshmitarët kyç të përfshirjes së ish-ministrit në trafikun e drogës.
Por, pas zhurmës së madhe në vend, së fundmi ka ardhur edhe reagimi i ministrit të Drejtësisë së Italisë, Andrea Orlando, lidhur me ekstradimin e financierit të Habilajve, Nazer Seitit.
“Dorëzimi i tij është në koherencë me angazhimet ndërkombëtare që janë detyruese për autoritetet italiane dhe shqiptare, sipas Konventës europiane të ekstradimit të 13.12.1957 dhe Marrëveshjes dypalëshe të firmosur në Tiranë me 3.12.2007”, thuhet ndër të tjera në deklaratën e Andrea Orlandos.
DEKLARATE E MNISTRIT ITALIAN TE DREJTESISE ANDREA ORLANDO
“Falenderoj autoritetet shqiptare të cilat ju përgjigjen menjëherë, kërkesës për ekstradim të shtetasit shqiptar SEITI Nazer, i kërkuar nga autoritetet gjyqësore italiane në kuadër të një hetimi të rëndësishëm ndaj një organizate kriminale që vepronte në fushën e narkotrafikut, në linjat italo-shqiptare.
Dorëzimi i tij është në koherencë me angazhimet ndërkombëtare që janë detyruese për autoritetet italiane dhe shqiptare, sipas Konventës europiane të ekstradimit të 13.12.1957 dhe Marrëveshjes dypalëshe të firmosur në Tiranë me 3.12.2007.
Kryerja e dorëzimit, i mundëson autoriteteve italiane ushtrimin e plotë të hetimit dhe të jurisdiksionit mbi faktet e rënda që përbëjnë objektin e hetimit të Prokurorisë së Catania-s, pa paragjykuar zhvillimet e procedimit që paralelisht po kryhet nga pala shqiptare, e cila madje mund të përfitojë nga bashkëpunimi i autoriteteve italiane, në bazë të konventave për ndihmën gjyqësore, që janë në fuqi mes dy vendeve tona”.
