Ministria e Drejtësisë ka kërkuar garanci nga shteti italian për ekstradimit e të ashtuquajturit “baroni i drogës”, Alket Hatijajn.
Kjo kërkesë është bërë sipas parashikimeve të Kodit të procedurës Penale, që hyri në fuqi me datë 1 gusht.
Në kod parashikohet që për ekstradimin e një shtetasi shqiptar, nevojitet që shteti kërkues të japë garanci se do ta shqyrtojë vendimin e dhënë në mungesë të të pandehurit.
Për Hatijajn vendimi me 20 vite burg për pjesëmarrje në organizatë kriminale me qëllim trafikimin e drogës, është marrë në mungesë të tij ndaj nevojitet që ky vendim të rishikohet.
Rishikimi bëhet me qëllim që të mos shkelen të drejtat e personit të pandehur dhe që ai të ketë mundësi për mbrojtje efektive duke i dhënë mundësinë të paraqesë prova e fakte në favor të tij.
Nëse autoritetet italiane nuk japin përgjigje pozitive për kërkesën në fjalë, atëherë gjykatat shqiptare janë në kushtet e refuzimit të ekstradimit të të kërkuarit.
