Prokuroria e Krimeve të Rënda kërkoi sot “arrest me burg” për Albert Veliun. Ai denoncoi publikisht se vëllai i Fatmir Xhafajt ishte i përfshirë në trafik droge.
Veliu, i njohur si “Babalja” apo “Dëshmitari X”, akuzohet për kallëzim të rremë në bashkëpunim.
Albert Veliu dha një intervistë për gazetarin Jetmir Olldashi, e cila për herë të parë u publikua nga Partia Demokratike. Ai kishte regjistruar një bisedë e cila sipas tij vërtetonte përfshirjen e vëllait të ministrit Fatmir Xhafajt në trafik droge.
E njëjta akuzë rëndon mbi Fredi Alizotin, kunatin e Veliut apo “Dëshmitarin X”. Ky i fundit mësohet të jetë personi që në disa raste dublon Agron Xhafajn në përgjigjet që i jep “Dëshmitarit X” apo Albert Veliut.
Po ashtu mësohet se Prokuroria ka dhënë masën “detyrim paraqitje” për gazetarin Olldashi, i cili intervistoi të ashtuquajturin “Dëshmitari X”. Të tre akuzohen për kallëzim të rremë.
Në përgjigjjjen e ekspertizës britanike thuhet se audiopërgjimi ku shfaqet Albert Veliu është i montuar. “Zëri në audio-përgjim është shumë i dobët. Është e pamundur të identifikohen zërat”, thuhet tekstualisht në ekspertizën angleze.
