“Trupat amerikane duhet të marrin kontrollin e menjëhershëm të perimetrit të aeroportit të Kabulit, për të parandaluar një sulm tjetër gjatë procesit të evakuimit”, thotë një ekspert amerikan në luftën kundër terrorizmit.
“Eshtë thjesht e papranueshme që SHBA ose ndonjë komb i civilizuar, do t’i besonte talebanëve për të siguruar sigurinë”, tha ambasadori Nathan Sales, ish-i dërguari special në koalicionin global për të mposhtur ISIS-in. Ai foli për programin ‘Today’ të BBC-së.
Nathan Sales u shpreh se Presidenti Biden duhet të veprojë sipas premtimit të tij, për të kapur përgjegjësit për sulmin, dhe i kërkoi qeverisë amerikane të rimendojë planet e saj për t’u larguar deri më 31 gusht.
“Ne duhet të mbajmë një prani ushtarake në terren, për aq kohë sa duhet për të evakuuar çdo amerikan”. Ambasadori Sales tha se historia ka të ngjarë të gjykojë vendimin e Shtëpisë së Bardhë për të dorëzuar kontrollin e bazës ajrore Bagram në fillim të korrikut, si “monumentalisht të paaftë”, pasi do të kishte qenë një bazë “shumë më e sigurt” nga e cila do të evakuoheshin amerikanët dhe aleatët e tyre se sa aeroporti i Kabulit.
Burimi i lajmit: BBC. Përshtatur nga Tirana Today
