Kolegji Zgjedhor me vendimin e tij të ditës së nesërme do t’i bëjë të pamundura zgjedhjet e 18 Qershorit.
Trupa e Kolegjit Zgjedhor do të shqyrtojë kërkesën e Partisë Agrare Ambientaliste dhe Partisë Aleanca Popullore lidhur me ankimin për paligjshmërinë e regjistrimit të listave për kandidatë për zgjedhjet parlamentare.
Sipas burimeve për “Tirana Today”, Kolegji Zgjedhor do të pranojë kërkesën e këtyre dy partive duke e cilësuar rrjedhimisht datën 29 prill si datë jashtë afatit ligjor për regjistrimin e kandidatëve për deputetë për zgjedhjet e 18 Qershorit.
Sipas afateve ligjore, partitë politike që vendosën të marrin pjesë në zgjedhje duhet të kishin regjistruar listën e kandidatëve për deputetë në datën 28 prill, si afatin e fundit të përcaktuar në Kodin Zgjedhor.
Duke marrë në konsideratë regjistrimin e listës së kandidatëve për deputetë, sipas partive ankuese Komisioni Qendror Zgjedhjeve ka shkelur afatin ligjor.
Nisur nga kjo dispozitë ligjore, Kolegji Zgjedhor, me trupën gjyqësore; relator, Gjin Gjoni dhe gjyqtarët Sotiraq Lubonja, Tomor Shkreli, Ridvan Hado e Artur Malaj pritet që të pranojnë kërkesë-padinë e PAA-së dhe PAP-së duke e bërë nul datën 18 Qershor.
Çfarë ndodh pas vendimit të Kolegjit Zgjedhor?
Nëse Kolegji Zgjedhor do ta quajë të paligjshëm vendimin e KQZ-së për regjistrimin e listave të subjekteve zgjedhore dhe kandidatëve të partive politike të majta, zgjedhjet në 18 Qershor nuk mund të zhvillohen. Në këtë mënyrë, hyjmë në një situatë të re ligjore në raport me zhvillimin e zgjedhjeve parlamentare ndërsa kriza politike mund të thellohet më tej.
Ndërkaq, Komisioni Qendror i Zgjedhjeve nuk mund të vazhdojë më punën për administrimin e procesit zgjedhor.
Duke mos pasur mundësi për administrimin e procesit zgjedhor, Komisioni Qendror i Zgjedhjeve njofton Kuvendin e Shqipërisë për t’i dhënë një zgjidhje kësaj situate.
Që të mblidhet Kuvendi, së pari duhet një dakordësi politike midis palëve. Por, mundet që edhe mazhoranca aktuale me shumicën e saj, prej 84 votash të mbledhë Kuvendin në një seancë plenare të jashtëzakonshme për të bërë ndryshimet në Kodin Zgjedhor dhe në Kushtetutë.
Zgjidhja që mund të vijë nga Kuvendi lidhet me ndryshimet që duhet të bëhen në Kodin Zgjedhor, ndryshime të cilat do të bënin të mundshme procedurat për datën e zgjedhjeve. Datat e mundshme mendohen 30 qershori, 16 korriku, 3 dhe 9 shtatori.
Kjo do të thotë, një rifillim i ri i procesit; përcaktimin e datës së zgjedhjeve, regjistrim të subjekteve zgjedhore, regjistrim të kandidatëve për deputetë dhe nisjen e fushatës elektorale. (TIRANA TODAY)
