Ardjan Nezha, kreu i Prokurorisë së Elbasanit, i komanduar nga Arta Marku, është shprehur për Tirana Today se së shpejti ai do të nisë punën normalisht, teksa Gina po i liron zyrën.
Kështu, Nezha ka përgënjeshtruar lajmin që qarkulloi këto 24 orë se Dritan Gina, prokurori i shkarkuar nga Marku, nuk e ka liruar zyrën e tij, por është paraqitur edhe sot në ambientet e Prokurorisë së Elbasanit.
“Sot në mëngjes kam pirë kafe me z. Gina. Nuk kam pasur asnjë përplasje me të. Kemi komunikuar normalisht. Ai po tërheq sendet e tij personale dhe pasi të tërheqë sendet e tij, unë do të jem në zyrë. E rëndësishme është që Prokuroria e Elbasanit është në punë”, u shpreh Nezha për Tirana Today.
Edhe dje në media u përfol se ka pasur një përplasje mes Ginës dhe Nezhës, teksa ky i fundit mbërriti në Prokurorinë e Elbasanit.
Por, burime të Tirana Today konfirmuan se në të vërtetë Nezha është shoqëruar nga Kosta Beluri dhe ka pasur një prezantim me vartësit e tij, duke hedhur poshtë çdo theshethem tjetër.
Nga ana tjetër, Gina ka depozituar para pak minutash një kallëzim penal ndaj Kryeprokurores së Përkohshme, Arta Marku, vetëm një ditë pas largimit të tij nga detyra. TIRANA TODAY
