Pas mbarimit të mandatit të Bujar Leskaj në krye të KLSH-së, zbulohet emri i personit që do të vihet në krye të këtij institucioni.
Burime të Tirana Today konfirmojnë se në krye të Kontrollit të Lartë të Shtetit pritet të vijë gjyqtarja Vitore Tusha.
Por, kush është Vitore Tusha?
Tusha është diplomuar në vitin 1983 në Fakultetin e Drejtësisë në Universitetin e Tiranës. Nga viti 1983 deri në vitin 1990 ajo ka punuar si përmbaruese gjyqësore në Tiranë dhe prej 1990 deri në 1992 si avokate. Në periudhën 1992-1994, Tusha ka ushtruar detyrën e gjyqtares në Gjykatën e Tiranës dhe në vitet 1994-2001 atë të gjyqtares në Gjykatën e Kasacionit – ku nga viti 1999 deri në vitin 2001 ka udhëhequr kolegjin civil të kësaj gjykate.
Nga viti 1986 e në vazhdim ka qenë lektore e së Drejtës Civile dhe Procedurës Civile pranë Fakultetit të Drejtësisë në Universitetin e Tiranës dhe Shkollës së Magjistraturës. Ne vitin 2008 ajo u zgjodh gjyqtare në Gjykatën Kushtetuese.
Presidenca njoftoi në tetor hapjen e procesit për kandidatë për Kryetar të Kontrollit të Lartë të Shtetit, në përfundim të mandatit 7-vjeçar të kreut të KLSH-së, Bujar Leskaj.
Afati i paraqitjes së shprehjes së interesit shoqëruar me dokumentacionin e nevojshëm, ka qenë nga data 12 tetor 2018 deri më datë 30 tetor 2018.
