Parku Kombëtar “Bredhi i Hotovës” në Dangëlli është padyshim një nga mrekullitë e natyrës shqiptare. Edhe pse rrugëtimi rreth 30 apo më shumë kilometra nga Përmeti është i vështirë për shkak të rrugës që nuk ka asnjë metër të shtruar, pamja në të kundërt ofron mrekulli më vete.
Parku ka një hapësirë rreth 34 mijë hektarë dhe për fat të mirë i ka shpëtuar deri diku dalldisë kolektive e shkatërrimtare që preku në masë zonat e pyllëzuara në të gjithë vendin.
Plot 1200 hektarë janë të mbuluara vetëm më masivët e mbrojtur të bredhit, ndërkohë që nuk mungojnë lisat, panja, shkoza, ilqe e kështu më radhë.
Këtu nuk ka lokale, nuk ka ndërtime betonizuese, nuk ka asnjë lloj infrastrukture moderne, madje edhe fshatrat përreth mbahen me një numër të kufizuar banorësh.
Sigurisht bota shtazore pas moratoriumit, por edhe statusit të veçantë që gëzon ky vend ka nisur të pasurohet përsëri. Në park janë hasur kaprollë, ariu i murrmë, derri e lepuri i egër, e sigurisht dhelpra, ujqër e deri dhi të egra.Është e pamundur të jesh në këtë vend e të mos mahnitesh. Raporti me natyrën këtu është i drejtpërdrejtë.
Kanionet, monumentet e natyrës e më tej edhe ato të kulturës janë një tjetër resurs i jashtëzakonshëm.
Nuk mungojnë livadhet e grykat e vetmuara mes pyllit, të cilat nuk ka sesi te mos kenë ndikuar edhe në penën e të madhit Naim Frashëri, fshati i të cilit ndodhet pak kilometra më tej.
Sigurisht një vizitë në fshatrat përreth është e domosdoshme për të shijuar jo vetëm mikpritjen e rrallë, por edhe gatimet tradicionale e kaq shumë të shijshme.
Ndoshta ky nuk do të ishte një udhëtim luksoz, komod apo i zhurmshëm, nuk ka fshatra të tejmbushur me banorë, hotele të mëdhenj dhe elementë të tjerë si këto, megjithatë kjo zonë mbetet një nga më të bukurat që ofron e gjithë Shqipëria.
Për ata që duan të prekin natyrën, të ndjejnë shpirtin e zemrën e saj, mërmëritjet e pemëve shekullore dhe ajrin e pastër, “Bredhi i Hotovës” është destinacioni ideal. Mos e humbisni! Të huajt e përzgjedhin shpesh këtë vend, ndërsa ne e njohim shumë pak. Ndoshta është koha për diçka ndryshe, pse jo?!
EKSKLUZIVE PËR TIRANA TODAY, NGA MARIN MEMA
