Inspektorët e Agjencisë Ndërkombëtare të Energjisë Atomike (IAEA) pritet të shkojnë në termocentralin bërthamor Zaporizhzhia në Ukrainën juglindore, diku këtë javë, mes bombardimeve të reja në objektin e kontrolluar nga Rusia dhe frikës në rritje për një aksident të mundshëm bërthamor.
Kjo vjen ndërsa forcat ukrainase përgatiten për një kundër-ofensivë në jug, sipas zyrtarëve të Shteteve të Bashkuara. Forcat e Ukrainës po përgatisin fushën e betejës, për një kundër-ofensivë të rëndësishme ukrainase, thanë për CNN dy zyrtarë të lartë amerikanë.
Operacionet e formësimit janë praktikë standarde ushtarake përpara një ofensive, dhe përfshijnë goditjen e sistemeve të armëve, komandës dhe kontrollit, depo municionesh dhe objektiva të tjerë për të përgatitur fushën e betejës për përparimet e planifikuara. Sipas zyrtarëve, SHBA beson se kundër-ofensiva e shumëpritur do të përfshijë një kombinim të operacioneve ajrore dhe tokësore.
Një ekip nga IAEA, mbikëqyrësi bërthamor i OKB-së është rrugës për në termocentralin bërthamor të Zaporizhzhia dhe do të jetë atje “më vonë këtë javë”, tha të hënën shefi i IAEA Rafael Mariano Grossi. Misioni do të vlerësojë dëmet në objektet e uzinës, do të vlerësojë kushtet e punës së stafit dhe do të kryejë aktivitete urgjente mbrojtëse.
Ministri i Jashtëm i Ukrainës, Dmytro Kuleba, tha se komuniteti ndërkombëtar duhet të kërkojë tërheqjen e Rusisë nga termocentrali, në mënyrë që të garantohet siguria bërthamore. Kremlini mirëpriti lajmin e vizitës, duke thënë se misioni i IAEA do të hyjë në centralin bërthamor të Zaporizhzhia nga pala ukrainase, por Rusia do të sigurojë sigurinë e saj në territorin e pushtuar nga ushtria ruse.
Qyteti i Orikhiv në rajonin e Zaporizhzhia pësoi më shumë se 200 sulme në një hark kohor prej gjashtë orësh, thonë zyrtarët ukrainas. Granatimet ndodhën gjithashtu në qytetin Enerhodar, të kontrolluar nga Rusia, afër centralit bërthamor, të dielën mbrëma, thanë zyrtarët rusë dhe ukrainas, ku secila palë fajësonte tjetrën për sulmet.
Granatimet në afërsi të uzinës Zaporizhzhia gjatë ditëve të fundit goditën një “ndërtesë speciale” që ndodhet vetëm 100 metra nga ndërtesat e reaktorit të saj, tha IAEA të dielën. Shefi i agjencisë bërthamore Grossi tha se sistemet e sigurisë në termocentral mbeten funksionale, nuk ka pasur rritje të niveleve të rrezatimit, nivelet e radioaktivitetit janë brenda një intervali normal. Nuk ka indikacione për rrjedhje hidrogjeni dhe centrali ka vazhduar aksesin në energjinë elektrike jashtë vendit.
Burimi i lajmit: CNN. Përshtatur nga Tirana Today
