Na ndan një muaj nga zgjedhjet e kryesisë së FSHF-së dhe akoma nuk kemi asnjë kandidat zyrtarë, përveç rikandidimit të presidentit aktual, Armand Duka. Pritet që të jetë një garë e fortë këtë vit mes Dukës dhe Bashkim Finos, ndryshe nga hera e fundit ku kishte një kandidat të vetëm. Deputeti i PS-së pritet që të zyrtarizojë kandidimin në ditët në vazhdim dhe një kandidat i tillë duket se ka tronditur mandatin e pestë të shumëdëshiruar të Armand Dukës.
Përpos kandidatit,presidentit aktual kanë filluar ti dalin në shesh edhe disa të palara, si “ato 8 vota nga shoqatat fantazmë rajonale” që ekzistojnë vetëm në zyrat e FSHF dhe në asnjë institucion tjetër shtetërorë. Por edhe aksionet e “Ama Caffe” që është edhe sponsori kryesorë i ekipit të Skënderbeut, që tregon edhe disa vota të sigurta që mund të ketë kreu aktual. Por nga ana tjetër Duka edhe ka sjellë përparësi në futbollin shqiptarë duke na reklamuar në Evropë. Tani është koha kur njerëzit do të ndahen dhe do të mbajnë një qëndrim të tyren për Dukën, nëse duhet të vazhdojë të jetë në krye të FSHF-s apo të largohet. I pari që ka dalë pro qëndrimit ka qenë ish-lojtari i kombëtares Edvin Murati, i cili është parë shpesh në krah të Dukës si në “Euro 2016” por edhe në evente të tjera.
Në një intervistë për të përditshme “Panorama Sport”, Murati, i cili tashmë drejton një agjenci të njohur menaxhimi lojtarësh, është shprehur qartazi për mos ndryshimin e kreut të FSHF për sa kohë që ai ka “punuar shumë” dhe institucioni më i lartë i futbollit në vend ka pasur rezultate të mira në punën e tij.
“Duhet ta nisim nga infrastruktura. Në një kohë të shkurtër janë bërë në Shqipëri tri stadiume të niveleve të mira. Mendoj se ka shumë projekte nga UEFA dhe FIFA që janë bërë në Shqipëri. Në vendin ku unë jetoj thonë: Parisi nuk u ndërtua për një ditë. Unë i respektoj të gjithë në Shqipëri, por kur diçka ecën mirë nuk ka pse të mos vazhdojë”, është shprehur Murati në intervistën e tij.
Ish-lojtari i kombëtares nuk ka lënë pa kujtuar arritjen historike të Shqipërisë në finalet e Europianit Francë 2016, por edhe rezultatet e mira të kombëtares Shqiptare në eleminatoret e botërorit Rusi 2018.
“Shqipëria arriti një kualifikim historik në Europian, ndërsa mendoj se një sukses i madh ishte dhe vendi i tretë në një grup me Spanjën dhe Italinë”.
Duke folur vlerësimin që ka UEFA për kreun e FSHF, Edvin Murati thotë: “Unë Jam afër UEFA dhe di t’u them se Duka është shumë i respektuar nga ky institucion dhe të gjitha federatat e vendeve Europiane”.
Aktualisht Komiteti Ekzekutiv i FSHF ka shpallur datën e mbledhjes së Asamblesë së Përgjithshme të FSHF, që është edhe dita e zgjedhjeve për kreun e këtij institucioni. Zyrtarisht ende nuk ka kandidatura të shpallura, por në media janë përvijuar si kandidatë potencialë kreu aktual i federatës, Armand Duka dhe deputeti i Partisë Socialiste, Bashkim Fino.
