Kandidati për kryetar i Partisë Demokratike, Eduard Selami thekson se nëse kjo forcë politike nuk del nga hija e Berishës, atëherë nuk do ta ketë të gjatë ekzistencën e saj.
Selami vuri në dukje se lista që hartoi Basha për zgjedhjet e 25 qershorit u krye e gjitha nën ndikimin e kryeministrit Berisha. Ndërsa shpjegoi se humbja e PD-së në zgjedhjet e 25 qershorit ishte e pritshme.
Kjo humbje sipas tij erdhi për gabime të brendshme të selisë blu dhe lidershipit i saj, që sipas Selamit, u shkel statuti i partisë.
Selami, a ishte i papritur ky rezultat i dobët i Partisë Demokratike?
Shenjat dukeshin, kishte një qetësi që nuk më pëlqente. Në 2013-tën ne dolëm në opozitë dhe ne nuk e morëm mesazhin e popullit. Ishim një opozitë me kokën prapa dhe rezultati nuk është befasues.
Është thënë se Basha nuk i shpëtoi dot hijes së rëndë të Berishës dhe ndikimi i tij duket se ishte lista e 25 qershorit, ku u latë jashtë ju dhe figura të tjera historike të PD. A ndikoi lista e Bashës në humbje?
Kjo nuk është shkencë ekzakte. Shqetësimi i parë nuk ishte problemi i emrave. Por, si mund ta quash dalje nga hija kur lista u hartua në mënyrë personale? Nuk u zbatua statuti. Kur ne në shtëpinë tonë flasim hapur për problemet, atëherë mund t’i ndryshojmë gjërat. Unë e kam mbështetur listën sepse ishte shumë vonë. Kur ne të vendosim meritokraci dhe konkurrencë do të mund të ndryshojmë dhe të sjellim një frymë të re. Basha e kishte këtë rast dhe nuk e përdori, prandaj jemi këtu. Duhet ta vendosë baza listën, jo demokrati, apo edhe socialisti.
Ju morët pjesë në fushatë. Sa e vështirë ishte të merrje pjesë kur ju e dinit që nuk do të ishit pjesë e Kuvendit?
Aspak. Problem nuk është kjo, problemi është kultura. Po guxove të kundërshtosh kryetarin je jashtë. Kjo është histori e shëmtuar sepse nuk është çështje personash, por çështje demokracie. Nëse ia pret je në autoritarizëm dhe jo në demokraci. 20 kryetarë të degëve rajonale të PD u hoqën pa u lajmëruar fare. Këto janë probleme që kemi prej 20 vjetësh.
Ju jeni përfaqësuesi i parë i PD që flisni pas humbjes. Ata që e njohin PD thonë se është një makineri e vërtetë elektorale. Pra, baza e PD është ndër më aktivet të saj. Përse nuk funksionoi?
Marrim rastin tjetër me pushtetin lokal. U zgjodhën kandidatët për kryetarë bashkie? Këto janë kompetencë e bazës, nuk u bë kështu. Prandaj duhet një debat i pastër, jo për t’i drejtuar gishtin një njeriu por për të bërë gjërat më mirë.
Mungojnë 200 mijë vota dhe ka një përputhje mes 200 mijë votave që i mungojnë PD-së dhe 200 mijë që mungojnë në shkallë kombëtare. Duket sikur 95 për qind e atyre që nuk kanë shkuar në votime janë mbështetës të PD. Por, Basha tha dje se rezultati u cenua nga shit-blerja e votave. Por ato thjesht kanë ndenjur në shtëpi. A e besoni këtë tezë të Bashës?
Nuk mund të mohosh një fenomen të shëmtuar që ekziston në Shqipëri dhe këtu është fajtore edhe PD, edhe PS, edhe LSI. Këto janë disa probleme që vetëm duke zgjidhur problemet e brendshme do të mund t’i zgjidhim. Por, kjo nuk mund të përdoret si alibi. Nëse ne duhet të kthehemi në forcë shprese, ne duhet të vendosim më parë rregull në shtëpinë tonë.
A i druheni një ndërhyrjeje të Berishës në procesin e zgjedhjes së kryetarit?
Jo, nuk i druhem.
A do ta takoni?
Po.
Është pak a shumë e njëjta situatë kur kandiduan Basha me Olldashin, kur Berisha e shprehu hapur mbështetjen për Bashën…
Nëse zoti Berisha mendon se zoti Basha është personi që duhet të vazhdojë drejtimin e PD, kjo është e drejta e tij dhe mua nuk më mbetet qejfi.
Nëse Berisha del dhe thotë se demokratët duhet të votojnë Bashën, ju mendoni se keni ende shanse të zgjidheni?
Po. Për mendimin tim kjo është çështje vizionesh. Zoti Berisha ka preferencat e tij dhe nuk ka pse ta fshehë mbështetjen për Bashën.
Nuk mendoni që ka ardhur koha që PD duhet të çlirohet nga tutela e Berishës?
Nëse PD nuk çlirohet nga tutela e kujtdo, atëherë kjo do të jetë e gabuar./Marrë me shkurtime nga intervista në ‘‘Top Story’’
