Kandidati në garë për kreun e PD-së, Eduard Selami, ka folur për raportin e tij me ish-kreun e kësaj partie, Sali Berishën.
Në një intervistë për “Panoramën”, Selami thotë se roli i Berishës do të jetë i rëndësishëm dhe se do të ketë bashkëpunim me të.
Megjithatë, Selami shprehet se do e vendosin forumet nëse do të merret parasysh mendimi i tij.
“Patjetër që do të kem një bashkëpunim me z.Berisha. Por jo si ky bashkëpunim që të jetë një hije e zbehtë, duke marrë anët më negative të tij, siç është autoritarizmi që ka marrë z. Basha. Por siç jemi ne Parti Demokratike, parti e vlerave dhe trashëgimisë, edhe unë do të marr anën më të mirë të z. Berisha.
Por në atë model të ri lidershipi që unë ofroj, z. Berisha do të jetë një zë, por nëse do të merret apo jo parasysh mendimi i tij, atë do ta vendosin forumet. Unë nuk e shoh lidershipin që të mënjanohet njëri dhe të vijë tjetri. Çdokush ka vlerë dhe pa dyshim z. Berisha ka vlerë në PD”, thotë Selami.
