Pedagogu Edmond Tupe u kthye pa dashje në një personazh me përmasa të jashtëzakonshme një ditë më parë, teksa policia e cilësonte ai “armikun e popullit”. Ai ishte në listën e personave të proceduar nga blutë e Tiranës, lidhur me protestën e studentëve.
I çuditur për këtë situatë qesharake, për të cilën u shpreh edhe më herët se po bëjnë çmos për ta bërë hero me zor, ai nuk e ka lënë me kaq.
Mjaft i shpenguar, e me një gjuhë të artikuluar pastër, ai e kalon këtë ngjarje si të ishte një shfaqje argëtuese. Pasi kjo, vërteton edhe një herë se shumë personazhe bëhen pjesë me masën, vetëm për të treguar se kush është pushteti.
Si një shuplakë të fortë ndaj Ramës, ai ka rrëfyer në një intervistë të fundit se deri dje, ai ka patur dëshmi penaliteti të virgjër.
Profesori ka ndarë me publikun disa detaje interesante, lidhur me zhvillimin e asaj dite, që përfundoi me lakimin e emrit të tij në “dosjet e policisë”.
I ftuar në emisionin “Top Talk”, me gazetarin Denis Dyrnjaja, ai tregoi se si e mësoi faktin që ishte proceduar penalisht për pjesëmarrjen e tij në protestën e studentëve. Ai ka thënë se ende nuk ka marrë asnjë njoftim zyrtar, ndryshe nga sa është përfolur në media.
“Nuk kam asnjë njoftim zyrtar që jam proceduar penalisht. Ma tha një miku im. Deri dje, kam pasur dëshmi penaliteti të virgjër.
Jam rritur në një familje me edukatë dhe në respekt të ligjit. Nga 4 akuzat, nuk e gjej veten te asnjëra. Unë isha mbështetës, jo organizator. Nuk kam hedhur vezë apo shishe ndaj institucionit; nuk kam bllokuar rrugën, sepse kam qëndruar në trotuar…”, deklaroi profesori.
Edmond Tupja shtoi se u bezdis nga ky procedim, por ai doli prapë në protestë. “Shkova në Kryeministri, dhe tregova se sërish jam në mbështetje të studentëve”.
