Si çdo ditë, “Tirana Today” vjen me edicionin informativ të lajmeve të orës 14:00. Në do të gjeni zhvillimet kryesore të ditës, nga vendi, rajoni e bota.
Ndërpritet seanca për “Avdylajt”
Është ndërprerë seanca te Krimet e Rënda për masën e sigurisë të arrestuarve nga grupi i Avdylajve, pjesë e së cilës janë edhe dy ish-deputetët e PS, Arben Çuko dhe Arben Ndoka. Një prej të pandehurve i ka rënë të fikët gjatë seancës në sallën e gjyqit. Bëhet fjalë për të pandehurin Vlash Gazulli, të cilit i është dhënë menjëherë ndihma e parë. Po ashtu në këtë seancë, dy ish-deputetët kanë kërkuar veçimin e tyre ndaj pjesës tjetër të grupit, pasi sipas tyre, nuk kanë lidhje me ta.
Masakra në Bllok/ Komandoja tregon se ku e hodhi pistoletën
Marviol Bilo, komandoja i cili dyshohet se ka qëlluar për vdekje Fabiol Gaxhan dhe ka plagosur rëndë Elion Haton dhe Ervis Martinaj, ka shumë gjasa që të vetëdorëzohet në policinë e Tiranës. Bilo nga arratia ka kontraktuar një avokat dhe është pikërisht ky person që po negocion me prokurorinë, për të realizuar vetëdorëzimin e komandos, që shkaktoi masakrën në zonën e bllokut në Tiranë.
Apeli i Krimeve të Rënda lë në burg kunatin e Babales
Apeli i Krimeve të Rënda ka lënë në fuqi masat e sigurisë për Fredi Alizotin dhe gazetarin Jetmir Olldashi. Alizoti është kunati i Albert Veliut dhe akuzohet për imitimin e zërit të Agron Xhafajt, të vëllait të ministrit të Brendshëm, Fatmir Xhafaj, në audio-përgjimin e publikuar nga PD-ja, gjë që e ka pranuar edhe vetë i pandehuri. Ndërsa për gazetarin Jetmir Olldashi është lënë në fuqi masa “detyrim paraqitje”. Ndërkohë që “Arrest në burg” është masa edhe për Albert Veliun.
