Një 17-vjeçare e cila ishte e zhdukur prej një jave, mbrëmjen e djeshme është kthyer në banesë. Kanë qenë familjarët ata të cilët kanë vënë alarmin për Valentina Cunin, por ajo ka zgjedhur që të rikthehet në banesë, pas mesazheve të vazhdueshme në emisionin “Pa gjurmë”.
Gjatë transmetimit live, pak minuta para përfundimit të emisionit, vëllai i Valentinës, Kristjani njoftoi kthimin në shtëpi të 17-vjeçares, ndërsa në studio nëna Vitore Lazeri dhe vëllai Edmond Cuni bënin apel për ndihmë.
Një vajzë që pretendoi të jetë mikesha 17-vjeçares, me anë të një mesazhi dërguar në emision, sqaronte arsyet e largimit të Valentinës. Ajo bënte me dije se arsyet e ndërmarrjes së këtij akti nga ana e shoqes së saj, ishte për shkak të zënkave me familjarët.
“Valentina ndodhet në një banesë në rrugën “Ali Demi’’, në Tiranë, dhe është larguar nga shtëpia për shkak të zënkave me familjarët, veçanërisht me një prej vëllezërve. Nuk e mban njeri me zor, por nuk dëshiron të kthehet në familje”, ka thënë mikesha e 17-vjeçares.
Mesazhi duket se ka qenë i qëllimshëm, pas presionit mediatik që ndikoi në kthimin e 17 vjeçares në shtëpi.
“Është kthyer në shtëpi, por nuk dëshiron të flasë. Eshtë mirë me shëndet’’, tha Kristjan Cuni, vëllai i 17-vjeçares.
