“Arrest me burg” ka qenë masa e caktuar nga Gjykata e Gjirokastrës për babë e bir, Hetem dhe Dino Muho, të cilët akuzohen për vrasjen e Alket Muhos. Ky i fundit u gjet i vrarë me plumb pas koke në fshatin Rabije të Memaliajt. Dy autorët, kushërinj të viktimës, akuzohet se vranë 43-vjeçarin për çështje pronësie.
Hetem Muho, 59-vjeç dhe Dino Muho, 20-vjeç akuzohen për vrasjen e 43-vjeçarit Alket Muho, i cili njihej edhe si personi që kishte denoncuar disa herë në polici për parcelat me kanabis që lulëzonin afër fshatit ku banonte.
Në sallën e gjyqit, të dy, si babai dhe djali mohuan akuzat dhe thanë se ndodheshin rastësisht në fshatin Rabije. “Pavarësisht konflikteve të mëparshme, me të kemi pasur raporte si me të gjithë banorët e tjerë të fshatit”, kanë thënë ata në gjykatë, duke mohuar të kenë lidhje me vrasjen.
Në sallën e gjyqit u zbulua edhe një detaj tjetër nga konflikti mes fqinjëve. Pak kohë më parë, viktima Alket Muho kishte qëlluar me sëpatë autorin e dyshuar Hetem Muho dhe mendohet që kjo ngjarje mund të ketë rindezur sërish sherret e vjetra mes tyre.
Dy vjet më parë ata kanë paditur në Gjykatën e Gjirokastrës viktimën, për tokat që sipas tyre nuk ishin të tijat. Hetem Muho pretendonte që viktima i kishte falsifikuar dokumentet e pronave, ndërkohë që 43-vjeçari pretendonte që e kishte e fituar tokën me ligjin 7501. Mësohet gjithashtu se ishte vetë Hetem Muho ai që e pushoi çështjen në gjyq, në mënyrë të njëanshme, për arsye ende të panjohura. Alket Muho, 43-vjeç, u vra me 7 plumba në fshatin Rabije të Memaliajt.
