Falë telefonatës së një qytetari, se dikush mbante një armë pa leje, ka sjellë reagimin e menjëhershëm të policisë, duke bërë të mundur arrestimin e këtij të fundit. Në pranga ka rënë një 53-vjeçar, i cili mbante armë zjarri pistoletë pa leje, në banesë.
Po kështu, policia ka bërë të mundur sekuestrimin në cilësinë e provës materiale të një arme zjarri pistoletë. Në pranga ka rënë shtetasi Hasan Koltraka, 53-vjeç, banues në fshatin Arras-Dibër.
“Arrestimi i tij u bë pasi një qytetar, ka telefonuar policinë se ky shtetas dyshohej se mbante armë zjarri pa leje, ku menjëherë shërbimet e Komisariatit të Policisë Dibër, kanë organizuar punën duke ushtruar kontroll në banesën e tij, ku kanë gjetur të fshehur një armë zjarri pistoletë TT, 3 krëhëra të mbushura me fishekë, dhe një kuti me 44 copë fishekë, gjithsej 65 copë fishekë pistolete.
Gjithashtu janë gjetur edhe 28 fishekë arme gjahu. Arma e zjarrit së bashku me municionin, është sekuestruar në cilësinë e provës materiale”.
Materialet proceduriale do ti referohen Prokurorisë Rrethit Gjyqësor Dibër, për veprën penale “Mbajtje pa leje dhe prodhimi i armëve, armëve shpërthyese dhe i municionit”.
