Tre nxënës shqiptarë nga Kosova kanë nisur vitin e ri shkollor në qiell të hapur, për shkak të mungesës së objektit.
Rasti shënohet në fshatin Gjyrishec të Kamenicës, ku shkolla “Skëndërbeu” në muajin korrik nisi të rikonstruksionohej, ndërsa prej tre javësh janë ndërprerë punimet.
Si pasojë, tre nxënësit e shkollës fillore kanë nisur vitin e ri shkollor në qiell të hapur, në kushte shumë të rënda.
Me gjendjen e shkollës u befasua edhe mësuesi Kadri Osmani, i cili pavarësisht mungesës së objektit, nuk po e humb vullnetin për t’i mësuar fëmijët. Kompania ka ndërprerë punimet, pasi pretendon se komuna nuk mori asnjë vendim për t’ua kompensuar materialin ndërtimor shtesë që nevojitet për shkollën.
Ndërkohë, i kontaktuar nga Klan Kosova, drejtori i arsimit në Komunën e Kamenicës ka thënë se kjo situatë është e përkohshme dhe se do të zgjidhet shumë shpejt.
