Ish-zëvendës ministri i Arsimit, Taulant Muka ka reaguar pasi u përzu nga protesta e studentëve sot para Kryeministrisë.
Muka iu bashkua protestës së studentëve, në ditën e 13-të teksa madje mori mikrofonin për të folur për kauzën e tyre. Megjithatë prania e tij duket se ka bezdisur disa studentë, që shpërthyen në thirrjet “Ik, Ik, Ik!”
Por, si e komenton këtë incident ish-zëvendësi i Arsimit?
Muka ka sqaruar në ‘Fax News’ se këto janë ndërhyrje që bën politika për të paraqitur një imazh të asaj protesta që nuk është në të vërtetë. Ai u shpreh se nuk ka frikë për këto ndërhyrje. Madje sipas tij as studentët nuk kanë frikë por do vazhdojnë të kërkojnë arsim cilësor.
“Është politika , unë s’ kam frikë, unë e dua arsimin, ju keni qenë vetë të pranishëm kur unë kam qenë mes studentëve, por janë ndërhyrje politike që përpiqen të japin një imazh që nuk është.
Ne flasim për një arsim cilësor, ku vettingu është i rëndësishëm, tregon kush janë specialistët e vërtetë përcakton se kush është mjek dhe kush jo.
Studentët janë për një arsim bashkëkohor, pra qa do të thotë bashkëkohor? Që kurrikulat në Shqipëri të njehen edhe në Itali. Unë kam kërkuar që këta të publikojnë cv-të e tyre, në çdo vend të botës cv-ja është e publikuar.
Këta të rinj janë shumë të zgjuar, janë më të zgjuar se analistët, janë të lidhur me internetin. Kanë potenciale të jashtëzakonshme, madje ata shprehen se nuk shohin media se një pjesë e tyre bëjnë propagandë.
I them edhe kryeministrit edhe Monikës edhe Bashës se nuk kam frikë unë i kam nxjerrë diplomat, nxirrini dhe ju se paguheni me taksat tona. Unë për ato që i kam nxjerrë plagjiaturat do i çoj para prokurorisë.
Politika po dështon ditë ditës për të përçarë studentët. Ata u kanë qëndruar stoik atyre kërkesave, meqë kryeministri tha se rektorët e pedagogët janë të korruptuar, atëherë të shtohet edhe kërkesa për të shkarkuar dekanët e rektorët, meqë e tha kryeministri tha se janë të gjithë të korruptuar, atëherë një pyetje kam unë, pse nuk i shkarkon zoti kryeministër, qeveria është për të kontrolluar”, tha Muka ndër të tjera, ndërsa u shpreh se pavarësisht makinacioneve, studentët duhet të vazhdojnë protestën për kauzën e tyre pa frikë.
