Gjykata Evropiane e të Drejtave të Njeriut ka urdhëruar autoritetet në Bosnje dhe Hercegovinë që të heqin një kishë ortodokse serbe të ndërtuar në oborrin e një gruaje myslimane, pasi ajo u detyrua të ikte gjatë luftës, në vitet 1992-95.
Vendimi i shpallur nga Gjykata më 1 tetor, ka të ngjarë të përfundojë një betejë të gjatë ligjore të iniciuar nga Fata Orloviq dhe 13 anëtarët e familjes së saj, që shpëtuan nga masakra e Srebrenicës në vitin 1995.
Gjykata vendosi që ndërtimi i kishës më 1998 ishte i paligjshëm dhe urdhëroi autoritetet që të siguronin heqjen e saj brenda tre muajve. Si dhe të paguanin dëmshpërblim 5,000 euro për Orloviqin dhe 2,000 euro për të afërmit e saj.
Familja Orloviq ka luftuar në procese gjyqësore për ta hequr kishën që nga viti 2000, kur u kthyen në fshatin në Bosnjën lindore, rreth 20 kilometra në lindje të Srebrenicës.
Serbët më 1993 dëbuan të gjithë banorët myslimanë të Konjeviç Polje në Srebrenicë, një zonë e sigurisë e Kombeve të Bashkuara, duke vrarë rreth 8,000 burra dhe djem myslimanë, në atë që shihet si masakra më mizorë në Evropë që nga Lufta e Dytë Botërore.
