Ngjarja e rëndë e cila ka të bëjë me të riun i cili u mbyt me litar dhe u hodh në rezervuar, ka marrë një tjetër rrjedhë. Policia pretendon se motivi i krimit ishte lidhja me vajzën, e cila kishte një lidhje paralele dhe me njërin prej autorëve të krimit. Lidhur me këtë krim të rëndë, uniformat blu arrestuan për vrasjen shtetasit Valter Mollaj, Idlir Mollaj dhe Bledi Angjo.
18-vjeçarja Martina P., ka folur sot në emisionin “Me zemër të hapur” për vrasjen e Martin Çeços në Maliq, të riut i cili u mbyt me litar dhe u hodh në rezervuar. Martina mohoi të kishte pasur lidhje me 26-vjeçarin Martin Çeço dhe madje deklaroi se nuk e njihte fare. Ndërsa për të arrestuarit tha se punonin bashkë dhe emrat e tyre i kishte dhënë pas kërcënimeve nga policia.
Hetimet zbuluan se 26-vjeçari Martin Çeço ishte mbytur me litar, dhe më pas trupi ishte hedhur në rezervuar. Shkak i krimit dyshohet të ketë qenë një vajzë me të cilën kishte folur 26-vjeçari, por që mendohet se ka qenë në lidhje me një nga autorët e dyshuar, Valter Mollajn. Ekspertiza zbuloi gjurmë gishtash në litar që i përkasin 3 personave; Valter Mollajt, Edlir Mollajt dhe Bleti Angjos. Nga verifikimet e policisë, blutë kanë dyshime të forta se vajza ka qenë në një lidhje me një nga autorët e dyshuar, Valter Mollajn. Të tre këta persona u lanë në “arrest me burg” nga Gjykata e Korçës për akuzën e “vrasjes me paramendim të kryer në bashkëpunim”.
“Nuk jam në shkollë. Mbledh lule. Erdhi na mori policia, se unë nuk dija gjë fare, më thanë për një sqarim dhe ne shkuam. Nuk e njihja fare Martin Çeçon, nuk kisha biseduar me të. Fare. Më kishte çuar ftesë në Facebook dhe unë nuk e pranova se nuk e njihja. Kishte çuar një mesazh, por unë nuk ia ktheva. Nuk e kam parë as në fytyrë, thjesht në telefon. Valter Mollën e njoh, është nga fshati jonë. Është këtu me ne, na ndihmon. Policia më thoshte trego për Martinin, do të çojmë në burg dhe thashë për Valter Mollën. Më thoshin që trego, unë s’dija asgjë. Çfarë të tregoja për Martinin dhe nga frika e pranova akuzën.
Valter Molla dhe Idlir Molla nuk ishin aty kur po flisja me policët, erdhën më vonë. Mua nuk më bashkuan fare me ta. Kam vite që i njoh, këtu kanë jetuar, na kanë ndihmuar, i ndihmonim. Ngaqë e kishim babain e sëmurë. Bledi Angjo ishte çobani i Valit. Nuk e di çfarë marrëdhënie kishin, se unë kisha një vit që isha zënë me Valin se nuk i vajta një ditë në punë. Martin Çeço nuk kanë pasur lidhje fare me Valter dhe Lefter Mollën. Nuk kishin lidhje ata me Martinin. Nuk kam pasur lidhje me Valterin”, tha 18-vjeçarja.
