Përpara hapjes së merkatos verore në fundin e këtij sezoni, kishin nisur disa zëra për largimin e Taulant Xhakës nga Baseli, pasi kërkohej nga disa skuadra të njohura europiane. Mesfushori shqiptar është formuar te skuadra zvicerane dhe ka qëndruar besnik, megjithëse mundësitë për t’u larguar nuk kanë munguar.
Skuadra e njohur zvicerane e ka gjetur zgjidhjen për të bindur Taulant Xhakën, që të mos ndërroj skuadër gjatë merkatos. Lojtari i Kombëtares është graduar si zëvendës kapiten për sezonin e ardhshëm, duke marrë vlerësimin më të madh që nga koha kur e ka nisur me ekipin e parë të Baselit.
Është ky vendimi dhe njoftimi i fundit që vjen nga vetë skuadra në fjalë, e cila shprehet se sulmuesi Stoker do të jetë kapiteni i parë, ndërsa Xhaka si zëvendës kapiten për sezonin e ardhshëm.
Thuajse në të njëjtën mënyrë do të mbahet “peng” edhe Granit Xhaka te Arsenali. Sipas asaj që raportojnë mediat angleze, mesfushori i njohur do të qëndrojë pa “Champions League” dhe nuk do të ndërrojë ekip, pasi do t’i besohet shiriti i kapitenit.
