Nën dyshimet se ka pasur dijeni për vrasjen e Santiago Malkos, dhe ka penguar zbardhjen e së vërtetës, Policia e Tiranës arrestoi dje shtetasin Blendi Teta.
Falë pamjeve nga kamerat e sigurisë, rezultoi se 39-vjeçari kishte lëvizur disa herë në zonën e ‘Xhamllikut’ në momentin kur u ekzekutua ish-polici. Kjo ka bërë që ndaj tij të ngrihen dyshime se mund të jetë bashkëpunëtor në vrasje. Ai ka dëshmuar në polici se ka qenë një kalimtar i rastit. “Kam qenë vetëm kalimtar i rastit, nuk kam lidhje me ngjarjen”, është shprehur ai.
“Burimet bëjnë me dije se nga hetimet e deritanishme, sektori kundër vrasjeve në Drejtorinë e Tiranës, ka ndaluar shtetasin, të cilit i mësohen vetëm inicialet, B.T. 39 vjeçari është nga Tirana dhe dyshohet se ka kryer veprime për të penguar zbardhjen e së vërtetës, si edhe nuk ka kallëzuar krimin. Grupi hetimor beson se dëshmia e tij është kyçe për të treguar autorët ose porositësit e ekzekutimit”, njofton zyrtarisht policia. Ish-polici Santiago Malko u ekzekutua në zonën e Xhamllikut në Tiranë, mbrëmjen e 27 gushtit.
