Po çonte mbesën në shkollë, por ka përfunduar në spital. Ngjarja ka ndodhur në Elbasan, ku një grua 65-vjeçare është masakruar nga qentë, të cilët i kanë shkaktuar plagë të mëdha në trup.
Ngjarja ka ndodhur dje në mesditë në Njësinë Administrative Papërr, ndërsa e lënduara Lumturi Gjeli është dërguar menjëherë në spitalin kirurgjik të Elbasanit. Ajo u trajtua dhe u mjekua nga mjekët specialistë si dhe u vaksinua pasi kafshimi i qenit përveç plagëve shkakton edhe rreziqe të tjera për jetën.
Tashmë, gjendja e gruas është stabilizuar dhe ajo është larguar për në banesën e saj, ndërsa rasti në fjalë është nga më të rëndët.
Qentë e rrugës janë një problem ende mjaft serioz, teksa po shtohen rastet me persona të kafshuar nga ta, ndërsa ende nuk kemi parë një tentativë për zgjidhjen e këtij problemi, tashmë aktual në çdo qytet të Shqipërisë.
