Është gjetur kristali më i madh i gjelbër prej 5,655 karatësh, smeraldi u zbulua në minierat e Zambias. Guri, i cili peshon më shumë se 1.1 kg, u gjet në minierat e Gemfield në Kangem.
Smeraldi quhet “Inkalamu”, që do të thotë “luan” në gjuhën lokale të Zambias. Ai do të pritet në pjesë të vogla dhe do të shitet në një ankand në Singapor, gjatë muajit nëntor.
Smeraldi i gjetur ka “qartësi të jashtëzakonshme dhe një ngjyrë të gjelbër të artë, të përkryer, të balancuar”, thuhet në deklaratën e kompanisë që administron minierat.
Guri u gjet në një minierë të hapur më 2 tetor, nga gjeologu Debapriya Rakshit dhe eksperti i gurëve të çmuar Richard Kapeta.
Smeraldet janë të rralla dhe më të vlefshme se diamantet, duke qenë gurë të rrallë vlera e tyre në treg është rritur shumë. Shumica e smeraldeve në botë janë zbuluar në Zambia, Kolumbi dhe Brazil.
Elena Basaglia, gjeologe e minierave në Gemfields, tha se ka pasur një interes në rritje për smeraldet e Zambias, veçanërisht nga tregtarët në Evropë.
“Kërkesa për smeraldet me kualitet të lartë të Zambias rritet dita ditës dhe kryesisht kërkuesit janë nga Evropa. Të gjithë e admirojnë ngjyrën e tyre dhe transparencën unike që kanë gurët tanë, cilësi që i bëjnë unike nga smeraldet e tjerë”, tha Basaglia.
Por ky nuk është guri më i madh smeraldi që është gjetur. Në vitin 2010, minatorët në operacionin me bazë në Zambia gjetën një smerald 6,225 karatësh që e quanin “elefant” për shkak të madhësisë që kishte. TIRANA TODAY
