Miralem Pjanic është një ndër mesfushorët më të talentuar në qarkullim dhe aktualisht është pjesë e kampionëve të Italisë, Juventusit. Gjatë merkatos së kësaj vere boshnjaku ka pasur oferta nga klubet më të mëdha europiane, por bardhezinjtë vendosët t’i refuzojnë ato dhe tani me rinovimin e kontratës, i japin një sinjal mesfushorit, se besojnë shumë te ai.
Një ditë më parë u lajmërua se ishte arritur akordi mes dy palëve, sot gjithçka është bërë zyrtare. Mesfushori boshnjak do të mbetet pjesë e bardhezinjve deri në vitin 2023, pasi drejtuesit e klubit vendosën t’i zgjasin edhe për dy vite të tjera kontratën atij. Për më tepër, me kontratën e re janë përmirësuar ndjeshëm edhe termat financiarë të saj, me boshnjakun që tashmë pritet të fitojë rreth 6.5 milionë euro në vit.
