Në pikën kufitare të Kakavijës po ndodh një kaos, ku qytetarët janë bllokuar për shkak të një problemi në sistemin kompjuterik, duke mos i lejuar që të kalojnë kufirin.
Kështu, ky problem i nisur që prej orës 22:00 të mbrëmjes së djeshme ka shkaktuar radhë të gjata, ndërsa shumë të tjerë janë detyruar të kthehen.
I njëjti problem është edhe në Kapshticë, ndërsa mësohet se lejohet vetëm kalimi i personave me dokumente greke dhe personat që janë brenda zonës Schengen.
Lidhur me situatën kaotike ka reaguar edhe poeti dhe publicisti Agim Doçi, i cili u shpreh se shqiptarët po trajtohen si dele nga pala greke, ndërsa disa prej emigrantëve të kthyer, u është thënë se “e keni peshqesh nga Himara”.
“Janë 13 autobusë në pritje për të kaluar. Disa emigrantë i kanë kthyer mbrapsht. Emigrantëve i thanë ‘e keni peshqesh nga Himara’.
Shtetasit shqiptarë po trajtohen si dele. Ministria e Jashtme të ndërhyjë për këtë situatë”, tha Doçi në një lidhje telefonike me News 24.
