Shtyhet seanca ndaj Eftimios Eftimiu, grekut i cili dyshohet për vrasjen e Devi Kasmit. Seanca pritej të mbahej ditën e djeshme, për të caktuar masën e sigurisë ndaj grekut, por ky i fundit i ka shprehur Gjykatës së ndihej i kërcënuar për jetën.
Greku i dyshuar për vrasjen e Devi Kasmit, mbrëmjen e 29 janarit në kryeqytet në Kinostudio, pretendon se është kërcënuar me jetë, prandaj nuk dëshiron të sillet në kryeqytet.
Eftimio Eftimius i ka dërguar një letër Gjykatës së Krimeve të Rënda, ku shprehet se ndihej i kërcënuar dhe me gjithë dëshirën e tij të madhe për të marrë pjesë në këtë seancë, nuk mundej të ishte prezent pasi i rrezikohej jeta.
“Kam marrë dijeni për datën dhe orën e seancës që do të zhvillohet ndaj meje, ndaj bëj me dije Gjykatën se e kam të pamundur të jem i pranishëm në këtë seancë. I nderuar kryetar i trupit gjykues, dua të jem dhe të marr pjesë në seancë, por nuk dua të transportohem drejt kryeqytetit se ndihem i pasigurt për jetën time”, thuhej në letrën drejtuar Gjykatës së Krimeve të Rënda nga i dyshuari si ekzekutor i Devi Kasmit.
Edhe avokati i tij mbrojtës, Saimir Vishaj ka pohuar pretendimet e shtetasit grek, por nuk ka dhënë detaje lidhur me llojin e kërcënimeve.
Kështu, Krimet e Rënda e shtynë seancën për të enjten në orën 14:00, duke i dhënë mundësinë Policisë së Burgjeve të bëjë shoqërimin e Eftimiut dhe kthimin e tij brenda ditës në Bradashesh, aty ku po mbahet aktualisht.
Eftimiu është një nga 4 personat e dyshuar për vrasjen e Kasmit, ndërsa ai ka pretenduar se nuk ka lidhje me këtë ngjarje, duke thënë se kishte ardhur në Shqipëri vetëm për qëllime turistike.
Ish-efektivi i Policisë greke, Eftimios Eftimiu dyshohet se është paguar për ekzekutimin e 40-vjeçarit rreth 25 mijë euro. Kujtojmë se në momentin e arrestimit në banesën ku qëndronte shtetasi grek, u gjet një sasi eurosh dhe lekësh, të cilat bashkë kapnin shifrën e 25 mijë eurove.
