Gjykata ka dhënë vendimin për deputetët e Vetëvendosjes Albin Kurti, Donika Kadaj-Bujupi, Faton Topalli dhe Albulena Haxhiu, të cilët janë shpallur fajtorë për hedhjen e gazit lotsjellës në Kuvendin e Kosovës.
Këta të fundit nuk u paraqitën në seancë, ndërsa gjykatësi Beqir Kalludra shpalli aktgjykimin, duke dënuar deputetët me kusht.
Albin Kurti u dënua me 1 vit e 6 muaj burgim; Albulena Haxhiu me 1 vit e 3 muaj; Donika Kadaj-Bujupi me 1 vit e 6 muaj dhe Faton Topalli me 1 vit e 3 muaj burgim.
Migjithatë, deputetët duket se i kanë shpëtuar burgut, pasi dënimet nuk do të ekzekutohen nëse ata nuk kryejnë ndonjë vepër penale në kohëzgjatje prej dy vitesh.
Albin Kurti, Donika Kadaj-Bujupi, Albulena Haxhiu dhe Faton Topalli akuzoheshin për veprat penale “Përdorim i armës apo mjetit të rrezikshëm” dhe “Pengim i personit zyrtar në kryerjen e detyrës zyrtare”, lidhur me hedhjen e gazit lotsjellës në Kuvendin e Kosovës.
