Jepet dënimi për të ashtuquajturin “Eskobari i Ballkanit”. Gjykata e Krimeve të Rënda ka dënuar me 10 vite burg Kelmend Balilin, pas seancës gjyqësore që zgjati plot 5 orë.
Prokuroria kërkoi 18 vite burg për të, por gjykata dha dënimin me 10 vite burg, pasi Kelmend Balili përfitoi nga gjykimi i shkurtuar, duke përfituar uljen e dënimit me 1/3. Balili u dënua për “trafik droge”, “mosdeklarim të pasurisë”, “pastrim parash” dhe “grup të strukturuar kriminal”.
Gjatë seancës, mbrojtja e Balilit pretendoi pafajësi, ndërsa shtoi se edhe provat e vetme të prokurorisë, që ishin përgjimet, nuk vërtetonin që Balili është pjesë e grupit kriminal. Avokati Theodhori Sollaku, kërkoi rrëzimin e akuzave të Prokurorisë, si të pambështetura në prova.
Vetë Balili, i pranishëm në seancë nuk foli, ndërsa të pranishëm ishin edhe familjarë të tij. Ai u dorëzua në polici më 15 janar.
