Sërish një ngjarje tragjike në minierën e Bulqizës! Një minator 20-vjeçar ka humbur jetën, pasi i ka rënë sipër një masiv guri teksa punonte.
Sipas raportimeve të para, viktimë ka mbetur shtetasi E. Dama. I riu po punonte në zonën D të minierës. Kjo nuk është hera e parë që minator humb jetën në galeritë e minieriave së Bulqizës, ndërsa drama shtrihet edhe jashtë këtyre galerive ku familje të shumta, madje edhe fëmijë mundohen të mbijetojnë përmes mbledhjes së kromit dhe tregtimit të tij.
Kështu, para pak ditësh emisioni investigativ italian “Le Iene” publikoi një reportazh ku tregonte se si fëmijët braktisnin shkollën për të mbledhur krom, në mënyrë që të ndihmonin familjet e tyre sadopak.
Pamjet e publikuara shkaktuan reagimin e kryeministrit, i cili e cilësoi emisionin dhe median italiane “një kazan”, duke pretenduar se pamjet ishin të shumë viteve më parë dhe se kjo gjendje nuk ekzistonte në ditët e sotme.
Ky koment solli edhe reagimin e gazetares italiane, e cila hodhi poshtë pretendimin e kryeministrit Rama, duke shtuar se ka fakte që emisioni është filmuar në muajin tetor, pasi këtë e dokumentonin videot, fotot dhe biletat.
Mbrëmë në emisionin “Studio e Hapur”, kryeministri Rama u tërhoq, teksa tha se kishte folur pa e verifikuar informacionin në fjalë.
Për ironi të fatit, sot në minierën e Bulqizës humb jetën një 20-vjeçar, teksa punonte në zonën D.
Por, fatkeqësisht E.Dama nuk është as i pari dhe as i fundit që vdes brenda asaj minierë, dhe kjo për shkak të kushteve katastrofike me të cilat përballen punëtorët çdo ditë.
E teksa mohoi se ka fëmijë që mbledhin krom në Bulqizë, po sot a do e mohojë kryeministri vdekjen një 20-vjeçari në lule të rinisë brenda minierës “famëkeqe” të Bulqizës?
Mesa duket, numri i personave që kanë humbur jetën në atë minierë, nuk është i mjaftueshëm për të marrë masat që aty të punohet pa frikën se një masiv guri do të të marrë jetën nga momenti në moment.
