https://www.facebook.com/tiranatodaycom/videos/357329551378455/
Kërkesa e opozitës për debat lidhur me Komisionin e Reformës Zgjedhore ka shkaktuar replika të forta mes kreut të Pd-së Bashës dhe kreut të Kuvendit, Gramoz Ruçit.
Kreu i Partisë Demokratike i tha Ruçit se parlamenti nuk është pronë e mazhorancës dhe as e tij, teksa u shpreh:
“Opozita ka depozituar kërkesën për debat me emrat e folësve, ju vini të papërgatitur për debat se nuk e doni debatin. Mblidh konferencën e kryetarëve tani, opozita e ka bërë kërkesën pro rregullores. Ky parlament s’është pronë e mazhorancës, as e jotja, prandaj ndërpre tani seancën, konstato kush ka përgjegjësinë për këtë problem.
Keni lepurin në bark, jeni në hall me “rrugën e Elbasanit”, mblidh Konferencen e Kryetareve ose bëhu përgjegjës për bllokimin total të punimeve të këtij parlamenti. Vendos për një afat të arsyeshëm debati, s’mund të shtyhet me një javë, ne kemi kërkuar orën 4, por kjo seancë s’mund të procedojë në shkeljen e rregullave”, tha Basha.
Ndërkohë, Ruçi i është përgjigjur duke i tërhequr vëmendje Bashës për pushtim të foltores së Kuvendit:
“Nuk ka asnjë atribut konferenca e Kryetarëve kur seanca është e mbledhur për rendin e ditës, propozohet një pro dhe një kundër qoftë për futje ose nxjerrje nga rendi i ditës, diskutuan tre kolegë ndërkohë. Sipas nenit përkatës për të futur ose nxjerrë çështje të caktuara nga rendi u votua dhe konferenca e kryetarëve nuk merr kompetenca që nuk i ka. Kjo çështje është e mbyllur, nuk është mbyllje e gojës e opozitës, do ishte e tillë nëse unë nuk do lejoja të kishte diskutim, diskutim të ketë, nuk është e drejtë e seancës, as imja të ndërpresë diskutimin, kjo çështje konsiderohet e mbyllur.
Do ndëshkohesh dhe nuk dua ta nis seancën me ndëshkimin tuaj si deputet, zoti Basha ke pushuar foltoren. Tërheq vërejten sipas rregullores”, tha Ruçi dhe njoftoi 5 minuta pushim.
Pas rifillimit të seancës, Ruçi e ka përjashtuar Bashën nga seanca për thyerje të rregullores:
S’do të doja të jepja masën e parë për liderin e opozites. Jap masën e përjashtimit nga seanca plenare e Kuvendit zotit Lulzim Basha.
