Katër derra të egër që janë gjetur të ngordhur nga shoqata e gjuetareve, dy në Pusin e Thatë dhe dy në Morinë ishin shenjat e para të alarmit që vuri në lëvizje shërbimin veterinar në Kukës e Has. Pas inspektimit në terren, mostrat e marra u dërguan për analiza në Institutin e Veterinarisë, nga ku rezultuan të prekur nga mortaja e derrit. Drejtori i Shërbimit veterinar Bajram Peposhi, tha se u zbatuan protokollet përkatëse për asgjësimin e tyre.
Paraprakisht mësohet se sëmundja në fjalë, prek vetëm derrat dhe nuk është e rrezikshme për transmetueshmëri tek njerëzit apo kafshët e tjera, por me një shkallë mortaliteti 100 mund të depërtojë në komplekset e derrave të butë që mbarështohen në zona e ndryshme të vendit. Peposhi thotë se rastet në Pusin e Thatë dhe Morinë ishin të parat e shfaqjes së kësaj sëmundjeje në vendin tonë, ndërkohë që vendet kufitare të rajonit, Maqedonia e Veriut Kosova dhe Mali i Zi e kanë të pranishme prej një viti. Shërbimi veterinar i Kukësit por edhe ai kombëtar kanë ndërmarrë edhe masat paraprake për monitorim të rreptë të situatës në komplekset e derrave, duke qenë se nuk ka vaksinë apo masë tjetër që frenon sëmundjen.
Në Kukës nuk ka komplekse të mbarështimit të derrave, gjithsesi vitet e fundit është rritur ndjeshëm shtimi i tufave në derrat e egër pothuajse në të gjithë territorin e zonave të mbrojtura të qarkut, kjo fal edhe masave shtrënguese siç ishte moratoriumi i gjuetisë.
