Brenda pak orësh në vendin tonë janë shënuar dy aksidente, një prej tyre me pasojë vdekjen. Aksidenti i parë ndodhi në aksin Fushë-Krujë-Rinas, ku një automjet përplasi një tricikël dhe dy persona mbetën të plagosur.
Ndërkohë një aksident me pasojë vdekjen ndodhi sot në Bulqizë, rreth orës 10:05, në vendin e quajtur Peladhi – Ura e qytetit Bulqizë, ku një mjet doli nga rruga.
Nga verifikimet paraprake kanë konstatuar se shtetasi J.D., rreth 25 vjeç, banues në Maqellarë, duke drejtuar automjetin tip “Golf 4” ka humbur kontrollin dhe ka dalë nga rruga.
Drejtuesi i mjetit është dërguar menjëherë për ndihmë mjekësore në spitalin e Bulqizës, por si pasojë e plagëve të marra ka humbur jetën.
Në automjet udhëtonin dhe dy pasagjerë familjarë të drejtuesit të mjetit, të cilët nuk kanë pësuar lëndime. Grupi hetimor vijon punën për zbardhjen e shkaqeve të aksidentit.