Mjeku dhe studiuesi Taulant Muka, i cili denoncoi rastin e zv/ministrit të Arsimit, Ervin Demo, kërkoi dorëheqjen ose shkarkimin e tij. “Është shumë e thjeshtë, patjetër dorëheqjen e zv/ministrit të Arsimit, ose shkarkimin e tij. Këtë e ka treguar edhe bota perëndimore”, tha ai. Ai ka rrëfyer në një intervistë në “Ora News” se si e ka zbuluar plagjiaturën e artikullit të zv/ministrit. Studiuesi tha se çdo gjë mori udhë prej kuriozitetit. Teksa ka qenë duke kërkuar për botime të ndryshme, ai kishte hasur edhe botimet e zv/ministrit.
“Unë jam studiues, dhe duke qenë studiues ti ke kuriozitet. Kjo është bota kërkimore. Të kesh kuriozitet për diçka, dhe kjo betejë e imja për Universitetin në Shqipëri, ka filluar që në prill. Duke kërkuar për botime të ndryshme, më rastisën edhe botimet e zv/ministrit, dhe është shumë e thjeshtë nga se është kopjuar. Mjafton të bësh copy paste, të kopjosh një pjesë të paragrafit, vendose në google dhe ti do shikosh nga është kopjuar kjo pjesë. Të njëjtën gjë bëra dhe unë. Pastaj ka edhe mekanizma të tjera që janë softwere të plagjiaturës që dallojnë dhe janë të nevojshme që ne si shoqëri ti vendosim”.
Ndër të tjera ai tha se këtë rast e bëri publik, pasi mban një pozicion në shoqërinë tonë. “Unë bëra publik rastin e zv/ministrit të Arsimit, për shkak se mban një pozicion në këtë shoqëri që bën politikat, në rastin konkret të arsimit të lartë. Si është e mundur të bësh politikat e arsimit të lartë, kur zv/ministri i Arsimit të gjithë karrierën e tij akademike e ka pasur mbi materiale të kopjuara. Po a mund t’i besohet një personi të tillë apo personave të ngjashëm që të dalin garant për reformat në arsimin e lartë. Që të dalin garant që ajo që jepet në universitete është e cilësisë së lartë, apo që të jenë garant për gjithçka që universiteti duhet t’i ofrojë në mënyrë cilësore studentit”, përfundoi ai.
