Xherdan Shaqiri më në fund ka vendosur që ti kthejë përgjigje ish-shokut të skuadrës tek Stoke City, Charlie Adam, i cili doli hapur me disa kritika ndaj yllit me prejardhje shqiptare, duke e fajësuar për dështimin e skuadrës.
Stoke City përfundoi në tre vendet e fundit në sezonin që lamë pas në Premier League dhe do të mungojë të paktën një sezon në të. Tani pas një kohë relativisht të gjatë, Shaqiri është kthyer të flas për ish-bashkëlojtarin e tij, të cilit ia ktheu kritikat me të njëjtën monedhë.
“Mendoj se kjo është thënë vetëm nga xhelozia, sepse kam bërë një lëvizje të mirë duke u bashkuar me Liverpool”, ka thënë fillimisht Shaqiri për Evening Standard. “Isha i befasuar që ai foli ashtu për mua, por ndonjëherë është karakteri i një lojtari ai që flet. Unë e di që ajo që tha ishte krejtësisht e gabuar sepse në atë kohë kur unë luaja atje – sidomos kur kohët ishin të vështira – isha aty dhe shënova shumë gola.
Isha një nga të vetmit që ndihmuan ekipin me gola në ndeshje të vështira dhe ai ishte ai djali i cili mori kartonin e kuq në ndeshje të rëndësishme (kundër Everton) dhe humbi një penallti (kundër Brighton)”, përfundoi ylli shqiptar.
