Në oborrin e Universitetit të Prishtinës do të nisin gërmimet, pasi dyshohet se në atë pjesë mund të ketë varrezë masive.
Drejtori i Institutit të Mjekësisë Ligjore, Arsim Gërxhaliu, deklaroi se dëshmitarët kanë treguar se në atë hapësirë, gjatë kohës së luftës, ka pasur gërmime me ekskavatorë kryesisht natën.
“Puna jonë shpesh lidhet me kushtet atmosferike dhe shpesh mund të ndodh që lëvizet plani për një ditë, dy apo një javë, mirëpo ne jemi duke punuar në terren dhe në disa fronte.
Sot, kemi bërë planifikimin dhe zbatimin e urdhëresës së prokurores Drita Hajdari dhe të martën do të dalim në territorin e Universitetit të Prishtinës, tek Kisha Ortodokse për shkak të disa rrethanave të dëshmitarëve të një vendi ku e kemi gërmuar më herët. Por thuhet që është një vend tjetër dhe të njëjtin do ta kontrollojmë të martën në orën 09:00 në Universitetin e Prishtinës”, tha Gërxhaliu.
Ai ka treguar edhe për kohën kur ai vet kishte dalë menjëherë pas luftës në këto territore, dhe për gjërat që kishte hasur në bodrumet e Fakultetit Ekonomik dhe Juridik.
“Ai lokacion është lokacioni në të cilin e dimë fare mirë se në kohën e luftës kanë ekzistuar dy postblloqe të policisë, njëri ka qenë në pjesën e epërme të Fakultetit Juridik, aty ku është rruga e “Aktashit” dhe tjetri ka qenë në qoshin e udhëkryqit të hotel “Grandit”.
Nga këto dy post-blloqe të gjitha ata të cilët kanë qenë të ndaluar i kanë mbajtur në bodrumet e Fakultetit Ekonomik dhe Juridik të cilin e kemi vizituar pas luftës dhe ka qenë një vend në të cilin kemi pa mjete të cilat janë përdorur si: ndërresa të femrave, gjak etj. Gjithmonë është biseduar se në atë terren është punuar gjatë luftës sidomos natën me ekskavatorë. Njerëzit, dëshmitarët kanë parë se janë bartur disa qese të zeza, por ka qenë natë.”
Gërxhaliu shtoi se tre ditët e fundit kanë punuar në zhvarrimin e trupave të heronjve Afrim Zhitia, Fahri dhe Bahri Fazliu dhe Agron Rrahmani, të cilët do të rivarrosen nesër të Varrezat e Dëshmorëve.
