Ministria e Shëndetësisë dhe Mbrojtjes Sociale, pasi kundërshtoi vendimin e Urdhrit të Stomatologut për rritjen e çmimeve për shërbimet dentare, ka marrë një tjetër hap.
Mësohet se kjo ministri e ka dërguar çështjen në Gjykatë, duke kundërshtuar vendimin e Urdhrit të Stomatologut që vendosi thuajse dyfishimin e çmimit për një sërë shërbimesh dentare.
Ministria argumenton se Urdhri i Stomatologut nuk ka tagër për një vendimmarrje të tillë.
Lidhur me këtë vendim ka reaguar edhe Autoriteti i Konkurrencës, i cili bëri me dije se do shqyrtojë çështjen e më pas do dalë me një qëndrim nëse vendimi përbën shkelje ose jo.
