Trajneri i Argjentinë, Jorge Sampaoli ka befasuar në konferencën për shtyp para ndeshjes miqësore që do të zhvillojë me Italinë. Ai ka folur për dy sulmuesit më në formë të Serie A, që ai ka preferuar të mos i grumbullojë në këto dy sfida miqësore. Për Dybala tekniku i “albiceleste” e ka mbyllur derën përfundimisht për të marrë pjesë në Botëror, ndërsa për Icardin duke qenë si zgjedhje e parë për Sampaolin akoma ekziston një fije shprese.
“Për Dybalën menduam se ishte një yll futbolli, por nuk rezultoi kështu. Nuk di se ku qëndron problem, por ai nuk arriti të përshtatet me idenë tonë të lojës, ose ne ndoshta nuk ditëm ta vlerësojmë mirë. Icardi ka qenë gjithmonë një zgjidhje e parë, por vumë re një diferencë të madhe mbi përshtatjen e tij te Interi dhe atë në kombëtare. Raportet futbollistike me pjesën tjetër të skuadrës nuk ishin aty ku duhet. Nuk e përjashtoj, por diçka duhet të ndryshojë në mënyrë të shpejtë, pasi në kombëtare nuk kemi shumë kohë për të pritur”, tha Sampaoli.
Më tej trajneri i Argjentinës nuk i kurseu elozhet për liderin e skuadrës, Lionel Messin, por edhe për Gonzalo Higuainin, që u rikthye në kombëtare disa muajsh mungesë.
“Messi është një lider dhe nëse është në formë, atëherë do të jetë skuadra e tij, jo më e imja. Është një futbollist që mund të bëjë diferencën në çdo moment dhe duhet të funksionojmë në shërbim të lojës së tij, për ta vënë në kushte ideale. Edhe për Higuain mund të them se është një nga qendërsulmuesit më të mirë të momentin, nga i cili presim vërtetë shumë”, deklaroi trajneri i Argjentinës.
