Sezoni që sapo ka nisur nuk është ndër më të mirët për Paulo Dybala, ylli argjentinas në dy ndeshjet e fundit është lënë në stol nga trajneri Massimiliano Allegri. Presidenti i Palermos, Maurizio Zamparini është i bindur se “La Joya” do të largohet në janar nga Juventusi dhe shkak për këtë është trajneri.
“Sa herë që qëndron në stol, më bën të qaj”, tha Zamparini për “RMC Sport”. “Ai është në stol për shkak të Allegri-t. Allegri duhet të vijë në Palermo dhe të fitojë Scudetto-n (titullin), sepse është e lehtë të jesh fenomen me Juventusin. Dy vjet më parë i dërgova Dybala një mesazh dhe e këshillova që të shkonte në Spanjë, ku do të luante futboll dhe jo të qëndronte në Itali”, vazhdoi ai.
“Do të largohet, sepse Juventusi dëshiron të fitojë 120 milionë euro. Në janar unë mendoj se ai do të largohet, për në Spanjë. Ai ka oferta në Spanjë dhe Angli. Juventusi ka shumë kampionë dhe është e vështirë për të gjithë të luajë, por është patjetër një arsye për të qarë kur një fenomen si ai nuk luan”, shtoi Zamparini.
