Pas ‘përjashtimit’ nga ndeshja e Champions League përballë Crvena Zvezdas në Beograd, Xherdan Shaqiri e ka nisur titullar sfidën e sotme përballë Fulham. Liverpool arriti të marrë një fitore mjaft të rëndësishme me rezultatin e pastër 2-0, ku golat u shënuan nga Salah dhe Shaqiri.
Goli i parë shënohet nga Salah në fundin e pjesës së parë. Ishte Fulham që shënoi, por pozicioni i Mitrovic ishte i parregullt. Alisson tregohet mjaft i zgjuar në atë moment dhe nis topin menjëherë për Arnold. Mbrojtësi dha një pasim të gjatë për Salah, që e nxori të vetëm përballë portierit dhe egjiptiani nuk e fal një shans të tillë.
Në pjesën e dytë është sërish Liverpool që shënon shpejt. Këtë herë Robertson hedh një harkim në zonë dhe aty Shaqiri i gjendur i lirë godet direkt për të shënuar golin e dytë për “Reds” dhe të dytin për të në Premier League, pasi dy javë më parë i shënoi Cardiff-it.
Tashëm Liverpool kryeson në Angli me 30 pikë, një më shumë se Manchester City që do të përballet me United sot ën 17:30. Ndërkohë Fulham zhytet në vend të fundit me 5 pikë, duke regjistruar humbjen e gjashtë radhazi.
