Dy “dështakët” e Interit bëhen me ekip të ri

Ishin dy lojtarët më premtues tek Interi, që u bashkuan me shumë bujë. Njëri nuk pati shansin të startojë asnjë ndeshje nga fillimi, ndërsa tjetri luajti disa ndeshje dhe u duk mirë, më pas nuk u duk kurrkund në fushë. Bëhet fjalë për Gabigol dhe Joao Mario. Sulmuesi brazilian i blerë nga Inter dhe i huazuar te Benfica, ka mbyllur aventurën e tij në Evropë, për t’u rikthyer në Brazil. Ndërsa raportimet e fundit që vijnë nga mediat në Angli bëjnë të ditur se Joao Mario ka udhëtuar për në Londër për të kaluar në West Ham United.

Lajmin e ka deklaruar vetë sulmuesi, që prej kohësh kish shfaqur probleme me skuadrën portugeze. “Sot mbyll ciklin tim te Benfica. Dua të falënderoj klubin për mundësinë që më dha dhe shokët e skuadrës për miqësinë dhe mikpritjen”, shkruan në profilin e tij në Twitter sulmuesi brazilian. Ndërkohë pak minuta më vonë në profilin në Twitter të Santos konfirmohet operacioni i transferimit të sulmuesit. Gabigol do të jetë pjesë e Santos në formën e huazimit nga Interi.

Mesfushori portugez nuk ka kaluar edhe aq mirë tek Inter prej se ka ardhur, ndërsa Luciano Spalletti nuk e ka aktivizuar shumë. Këtë mëngjes Gazzetta dello Sport shkruan se ai do të huazohet për 1.1 milion euro, pasi ‘çekanët’ janë pajtuar ta paguajnë rrogën e tij. Joao Mario do të jetë sot në Londër, për t’i kryer vizitat mjekësore. Klubi anglez e ka të drejtën e blerjes në fund të sezonit. Mësohet se çmimi që i ka vënë Interi është 30 milionë euro. Joao Mario erdhi te Interit nga Sporting, pas shkëlqimit që kishte në kampionatin evropian.